ಕೃಷಿ - ಖುಷಿ.
ಪಶ್ಚಿಮ ಘಟ್ಟದ ಬೆಟ್ಟದ ಬುಡದಲಿ
ಮನೆಯನು ಮಾಡಿಹ ಓ ಗೆಳೆಯ,
ಸುಂದರ ಹಸಿರಿನ ಒಸರಿನ ಮಣ್ಣಲಿ
ಫಸಲನು ಬೆಳೆದಿಹ ನನ್ನ ಒಡೆಯ.
ಗದ್ದೆಯ ಉತ್ತು ನೀ ಬೆಳೆದಿಹ ಭತ್ತದ
ಪೈರಲಿ ತೆನೆಯದು ಮನ ಸೆಳೆವ,
ಫಸಲಲಿ ಬರೆದಿದೆ ಹೊನ್ನಿನ ಕುಂಡಲಿ
ಮಣ್ಣಿನ ಮಗನಿಗೆ ಭುವಿ ಹೃದಯ.
ಬಸುರಿನ ಬಾಳೆಯ ಹಂದರದಡಿಯಲಿ
ಬೆಳೆದಿಹೆ ಬದನೆ ಅಲಸಂದೆ,
ಬೆಂಡೆ ತೊಂಡೆ ಕುಂಬಳ ಸೌತೆ,
ಎಲ್ಲವ ಬೆಳೆದು ನೀ ಸುಖ ಕಂಡೆ.
ತೆಂಕಣ ಬಿಸಿಲಿಗೆ ಬೆದರುವ ಕಂಗು
ತೆಂಗಿನ ತೋಟದ ಮರೆಯಲಿ ಅಡಗಿ,
ಮೆಣಸಿನ ಬಳ್ಳಿಗೆ ಮುತ್ತನು ಕೊಟ್ಟು
ಒಡೆಯನ ಹೃದಯವ ಬೆಸೆಯುತಿವೆ.
ಹಟ್ಟಿಯಲಿರುವ ಗಬ್ಬದ ಗೋವು
ಮೆಲ್ಲುತಲಿಹುದು ಹಬ್ಬದ ಮೇವು,
ಬದಿಯಲಿ ಬೆಳೆದಿಹ ಹುಲ್ಲಿನ ಚಾದರ
ಕಂಡದು ಮರೆತಿದೆ ಪ್ರಸವದ ನೋವು.
ಸ್ಪೂರ್ತಿ,
ಬಂಟಕಲ್ಲು.
No comments:
Post a Comment